Marami nang bansa ang nagsisitumba
Dulot ng karahasan at politika
Pandemyang tumaob sa ekonomiya
Digmaang nagpamahal ng gasoline.
Pilipinas bansang aking sinilangan
Ikaw ay kasali sa kapighatian
Pero lumalaban sa hamon ng buhay
Ang lakas mong taglay ay walang kapantay.
Bansang Pilipinas ito ay matatag
Nakatayo sa gitna ng mga bagabag
Bagyo at pandemya’y hindi patitinag
Panginoong Diyos ang sandigang ganap.
Noong pandemya’y dumating sa ating bayan
Ang mga mamamayan ay nagtutulungan
Buong pusong tumulong sa kababayan
Para mabawasan ang kapighatian.
Mga kawani ng gobyerno’y nagtutulungan
Para maibsan ang krisis nitong bayan
Krisis sa ekonomiya’t edukasyon
Pilipino’y hindi patitinag doon.
Bansang Pilipinas ay punong Akasya.
Matatag kahit sa gitna ng sakuna.
Pagkat ang mga tao dito ay sagana.
Hindi nagkakait ng tulong sa madla.
Pilipino tayo, di tayo tutumba.
Sama-sama, tulong tulong na bumangon
Para sa kinabukasan ng mga bata
Pangarap ating abutin sa tuwina.
Manalangin at magpasalamat sa Diyos.
Sa pagtulong Niya sa atin ng lubos
Pagpalain nawa nitong bansang irog
Para ang mamamayan ay makaraos.