Dami nang pagsubok ang naranasan
Ang lahat na ito ay nalampasan
Nitong ating Inang Bayan
Sa tulong ng Poong Maykapal
Hindi lang bagyo't may lindol pa
Biglaang baha na rumaragasa
Maraming tao ang nawala
Bumuhos ang maraming luha
Dumating ang kinatatakutan
Pandemyang galing kung saan
Pagsugpo nito'y di alam
Subalit Pilipino ay maparaan
Mayroong mga namaalam
Mayroon ding nalampasan
Sakit ng damdamin at isipan
Nang mga taong nawala sa katinuan
Bagama't tayo ay dinaluhong
Buo pa rin ang loob na sinuong
Ang pakikibaka't pagkakataong
Mahanap ang lunas ng sakit na dumaong
Hinding hindi patutumba kanino man
Pilipinong handa kahit pa saan
Digmaan man ng isip at kalusugan
Nananatiling nakatayo't lumalaban
Pilipinas kang di patatalo
Sa ano mang pagsubok ng mundo
Matatag ang pagkatao
Nitong Pilipino mong taas noo
Kaya Pilipinas di ka patutumba
Sa ano mang bagyo at pandemya
Pagiging matapang ay nakaukit na
Sa puso't isip at damdamin nila.