I
Kayrami ng pagsubok ang hinarap ng bayan kong mahal
Noong una’y pananakop ng di mabilang na dayuhan
Nagpahirap at kumitil sa ating karapatan
Ngunit di sumuko, bagkus kasarinla’y ipinaglaban,
Kagitingan at katataga’y labis na pinatunayan
Nitong lipi ni Juan, ng mga inapo nina Gat Bonifacio at Gat Rizal.
II
BUkod sa pananakop na una nilang napagtagumpayan
Kayrami pang hamon ang hinarap nitong Inang Bayan
Sari-saring delubyo at sigwa ang dumatal
Ang hinarap ng mga Pinoy, angkin ang katatagan.
III
Mga pangyayaring hindi maiiwasan, pagkat nagmula sa ating kalikasan,
Tulad na lang ng bagyong malalakas na sa Pilipinas ay dumaraan,
Na lubos na nagpapahupay sa mga tahanan at maging sa kabayanan,
Nililimas mga pinundar na ari-arian, pinapawi ang rikit na taglay ng bayan,
Mapapaluha ka na lang sa sinasapit ng ating mga kababayan,
Lalo pa’t di mabilang ang mga buhay na nawawala at nasasayang.
IV
Ngunit nalampasan nitong bayang mahal ang pagkalugmok sa putik ng kasawian
Ang pagkalunod sa baha ng kawalan at ang pighati ng pusong naiwan
Nananatiling nakatayo at sa Diyos ay nakatanaw
Pag-asa sa puso ay di napaparam
Patuloy na hinaharap ang buhay
Bagama’t nangungulila at bulsa’y walang laman.
V
Ngunit sadyang mapaglaro ang tadhana, sinusubok ang katatagan nitong bayang sinta
Ng mga mamamayang Pinoy kung turan
Pagkat pandemya naman na tila magnanakaw ang sa Pilipinas ay dumatal
Walang pasintabi na ginulat ang bayan
Naging dahilan ng pagtangis ng ating mga kababayan
Nagdulot ng takot nang napakatagal.
VI
Bagong normal ay isinilang dulot ng pandemyang kainaman
Banta nito sa kalusugan ay sadya namang katatakutan
Pagkat pag tinamaan, tiyak ika’y raratay
At maaaring sa munting banga ang iyong abo ay mapalagay.
VII
Milyong Pinoy ang dumanas sa hagupit nitong pandemya
Marami man ang di pinalad at marami ang nagdusa
Tumangis man ng labis ngunit di mapapatumba
Bumagsak man ang ekonomiya, ngunit patuloy ang pag-asa
Pagkat sa pagdadamayan ang Pinas ay sagana
Walang naiiwan sa dami ng umaagapay na kasama.
VIII
Matatag na bayan ‘yan ang Pilipinas
Anumang pagsubok, hinaharap ng buong lakas
Pagka’t mga Pinoy na dito ay nananahan
Ay may pagtutulungan lubos ang pagmamahalan
Kaya’t di ka matutumba sa hamon ng buhay
Dahil na rin sa katatagang likas kay Inang Bayan.