Tayong mga Pilipino binuo ng pagbabago
Sa gitna ng mga pagsubok tayo’y solido
Agad na tumutulong sa mga nangangailangan
Subok tayo diyan base sa ating mga karanasan.
Nakukuha pa nating tumawa
Sa kabila ng kaliwa’t kanang problema
Tumutulong sa iba
Kahit na may sariling dala-dala.
Di natitinag ng kahit na anong sakuna
At kahit na anong banta
Sa tibay at pananampalataya tayo’y pinag-isa
Dahil tayo’y mga Pilipino na nagkakaisa.
Sa mga nagdaang panahon
Ginawa natin ang lahat para tayo ay umahon
Nagsipag sa lahat ng oras
Upang tayo ay manalo sa wakas.
Di alintana ang pagod
Para sa pamilya tayo ay kumayod
Buwis buhay sa pagtatrabaho
Alang-alang sa mga pangarap na binuo.
Mula sa galing ng ating mga ninuno
Hanggang sa mga kasalukuyang namumuno
Sama-sama sa hirap at ginhawa
Bagyo man o pandemya tayo ay magkasama.
Bilang isang Pilipino ako ay masaya
May pagbabayanihan na naiiba
Kahit mga dayuhan ikaw ay mahal na
O bansa kong Pilipinas nag-iisa ka.