Ang wika ay kaluluwa nitong ating bansa
Pinanday at pinagyaman ng mga dalubwika
Kasangkapang tunay sa pag-aral at pagtuklas
Sa diwang paglingap ay tunay nating namalas.
Wika’y kasangkapan, upang lumaganap kaalaman
At siya ring nagpabatid sa mayamang kasaysayan
Mula sa paniniil ng mga dayuhang mananakop
Wika ang nagpabuklod sa Pilipino at nagkupkop.
Kung mayroon mang wikang, nalikhang maging panlunas
Sa diwang Kolonyalismo tayo ay makaalpas
Iyan ang Pambansang Wika, tawag ay Filipino
Salamin nitong Kultura at Lahing Pilipino.
Sa pagpapalaganap ng usaping pangkapayapaan
Pinagtibay ng batas, itong ating pagkakakilanlan
Tatlong kapuluan, pinagkaisa ang ugnayan
Filipino at Katutubong Wika, pinagyaman.
Wikang Tagalog, pamana ng Biak na Bato
Na pinakinabangan ng maraming etniko
Wikang Filipino, ambag ni Pangulong Quezon
Isaman rin natin, natala sa Konstitusyon.
Maraming laban, binagtas nitong ating wika
Subalit ‘di nagpatinag, sa pwersang banyaga
Kongreso ay umaksyon sa gabay ng probisyon
Surian ng Wika, nakabuo ng solusyon.
Seguridad ng wika, kailangang alagaan
Laban sa sigwa at banta ng mga wikang dayuhan
Mabuti na lamang, at diksyunaro’y pinayagan
Upang magpalaganap ng hitik na kaalaman.
Upang makatugon sa pambansang pangangailangan
Ang Filipino at Katutubong Wika’y pagningasin
Kalakasan at kakayahan nito’y palaganapin
Sa pagpapatupad nitong Katarungang panlipunan.
Gampanin nitong wika ay pahalagahan
Katuwang ito sa malayang talastasan
Ingklusibo sa kapatira’t unawaan
Tungo sa pagkakabuklod ng sambayanan.
Instrumental ang wika sa pagsagot ng katanungan
Upang ang mga tao ay magkaroon ng kabatiran
Anuman ang gunam-gunam, gumugulo sa isipan
Wika ang kasangkapan sa pagtuklas ng kaalaman
Regulatori ang wika, sa pagtimo ng karunungan
Na dapat ikintal sa puso at isipan
Mabuting kaugalian ay tunay nating nalalaman
Upang magpayabong sa ating katauhan.
Interaksyunal ang wika na manatili ang ugnayan
Sa loob at labas man nitong ating bansa
Kapatira’t Bayanihan nakasanayan
Tatak ng Pilipino, diwang maka-Bansa.
Personal sa atin ang tungkulin ng wika
Upang ipahayag ang sariling adhika
Kalayaan at karapatan ating nakamtan
Utang na loob natin sa ‘ting Inang Bayan.
Imahinasyon naman ang yaman ng wika
Upang makalikha ng mga Obra Maestra
Sa anumang larangan nitong Panitikan
Mababakas Kasaysaya’t Kabayanihan.
Impormatibo naman itong wika natin
Upang malaman ang hitik na karanasan
Indibidwal, pangkat man at iba pang samahan
Mahalaga’y ugatin pagkakalinlan natin.
Filipino at Katutubo, wika ng kapuluan
Seguridad na tunay sa’ting malayang bayan
Lakas at bisig sa Ingklusibong kaalaman
Tungo sa pagbabago at makatarungang lipunan.