Ibat-ibang wika man ang ating ginagamit
Pinag-iisa naman tayo sa diwa at pag-ibig
Mayamang kultura ng ating Inang bayan
Bukal ng pagkakaisa at pag-uunawaan.
Saan man panig ng ating bansa
Wikang Filipino taglay ang gintong diwa
Salamin ng ating kulturang mayaman
Tatak ng kasarinlan, sagisag ng ating bayan.
Wikang Filipino ating palaganapin
Sa tuwina'y laging bigkasin at gamitin
Pinakikilala nito ang mayaman nating kultura
Upang ating bansa itanyag at makilala.
Lahing kayumanggi, wikang katangi-tangi
Pag-ibig sa iyo, walang pasubali
Sa buong daigdig wika'y ipakilala
Salamin ng ating mayamang kultura.
Tayong lahat ngayo'y hinahamon
Ipagmalaki ang ating wikang subok ng panahon
Bansang Pilipinas ay mamamayagpag
Ikaw, ako, tayo lahat mag-aambag.
Sama-sama tayo at magkapit-bisig
Wikang Filipino lalo pang lumawig
Diwa ng pagbabayanihan ay ating buhayin
Pagkakaisa ng lahi ating patatagin!
Wikang Filipino, wika nating mahal
Kulturang mayaman ay ating itanghal
Bayang Pilipinas ating ipagdangal
Watawat ng lahi ating iwagayway!