Ang buwan ng Agosto, ay panahong ang Wikang Filipino ay ginugunita
Ito ay itinakda upang bigyang-pugay ang dakilang salita
Ang wika na siyang kumakatawan sa tinig ng isang lahi
Animo’y makapangyarihang boses, himig ng isang nagkakaisang lipi
Kasinglinaw ng tubig ng batis, ang kadalisayan ng pagiging makatuwirang kasangkapan
Nitong taguring wika ng kayumanggi na sinasalamin mayaman nating pinagmulan
Sariwain at alalahanin mayamang kultura, tradisyon at mga kaugalian
Mga pamana ng nakaraan, ambag ng kasaysayan, sa tulong ng wika’y mababalikan
Ang Wikang maituturing na pinakamabisang sandatang mapanghahawakan
Sa pakikipagtunggali’y kalaban ay pawang kamangmangan
Hindi maisasantabi itong mainam na pananggalang
sa talastasan, at komunikasyon dala’y armas ng pangwikang karunungan
Wikang Filipino, nagsisilbing liwanag ng ating landas
Kung saan ba patutungo, dikta ng ating mga puso sa bukas
Mahusay na pakikipagtalastasan, maituturing na matibay na lakas
Sa hamon ng ‘di pagkakaunawaan, titindig ang bansang nagkakaisang ligtas
Panahon na upang dakilain ang wikang sa atin ay ipinagkaloob
Pinaghiwalay man ng mga isla ngunit mananatiling Pilipinas ay may pagkakabuklod
Pinag-isa sa diwa, pinagtibay ng salita
Sa wika natin masasambit kasaysayan ng ating bayang pinagpala
Kaya’t nararapat lamang nating paunlarin at higit pang pakamahalin
Kayamanang higit pa sa ginto, ang Wikang Filipino’y patuloy pang dapat payabungin
Ang wikang dakila ng marangal na dugong kayumanggi
Wikang Filipino tunay nga namang ating ipinagmamalaki!