Saan man sa mundo, kilala ang Pilipino
Sa trabaho’y mahusay, gawa n’ya ay pulido
Sa entablado man, arte’t awit ay totoo
Sinuman ay humahanga, tunay na saludo.
Sa larangan ng empleyo, hiling ay Pinoy sana
Mababa man ang pwesto, ugali ay dakila
Pinuno man ng ahensya, gawa’y kilala na
Pilipino, ‘di iba, ipagmamalaki ka!
Ang mga nabanggit, ay tunay at posibli na
Sa lakas at talino, sa sipag at tiyaga
Lahat kinakaya ng dahil sa isang wika
Ang Wikang Filipino, salamin ng kultura.
Kilalang mayaman na, ang kultura ng lipi
Bawat letra ng salitang nunukal sa labi
Ay mula sa wika, tagumpay ng ating lahi
Kaya tayo na’t gamitin, wika’y ipagmalaki.
Wikang s’yang naging dahilan ng pagkakasundo
Ng bawat pamilya, sambayanang Pilipino
Pag-angat ng isa, ramdam ng bayan at mundo
Ang totoong dahilan, ang Wikang Filipino.
Kulturang mayaman, bukam-bibig na ninuman
Nauunawaan, minamahal, ating ingatan
Magandang pamana sa ‘ting mga kabataan
Wikang tagapag-buklod ay ating alagaan.
Tayong mga Pinoy ay may Wikang Filipino
Taas noo, ipagmalaki sa buong mundo
Wala itong kaparis, habi nito ay simbolo
Salamin ng kultura, dangal ng Pilipino.