Ating mapapansin na sa kasalukuyang henerasyon
Ang usapang wika ay isa na lamang pagkakataon
Na nagiging paksa tuwing Agosto ng bawat taon
Kaya’t ito’y nagsisilbing isang napakalaking hamon
Upang ating ibida ang wika sa lahat ng panahon
Lingid sa ating kaalaman at hindi napag-uusapan
Ang kahalagahan ng wika sa bawat sambayanan
Isang wikang nagbubuklod at pinagkakakilanlan
Ng bansang malaya at may progresibong mamamayan
Nagtataguyod ng hustisya, pagkakaisa at pagmamahalan
Sa gitna ng kahirapan at pandaigdigang kaguluhan
Mabuting ugnayan ng bawat isa ay kinakailangan
Gamit ang wikang Filipino at pusong makabayan
Na hangad ay kapayapaan at pagkakaunawaan
at isinasabuhay ang mga mabubuting kaugalian
Boses ng bayan, Wikang Filipino, Wika ng Pag-asa
Salamin ng katarungan, tagapagtaguyod ng hustisya
Tagapagbigkis ng pamayanan, tungo sa pagkakaisa
Sa bawat kataga madarama ang matamis na biyaya
Pag-asa para sa mga Pilipino saan mang dako ng bansa
Wikang Filipino’y patuloy nating mahalin at ikarangal
Gamitin ng tama, at sa tuwi-tuwina’y ating itanghal
Sapagkat ito’y pamana ng ating mga ninunong nagpagal
Gamit mga sandatang tabak, sibat at angking dangal
Kalakip ang patnubay at biyaya ng Poong Maykapal.