Isang bansang dakila’t malaya
Butihing handog ni Amang Bathala
Kaya ikaw Pilipinas! Sa iyo ang puri
Sa lahat ng mananakop ika’y nagwagi
Kaunlaran mo’y natatanging hangad
Sagana sa kalikasan, kaya ika’y mapalad
Kaya’t tangkilikin natin ang sariling atin
Sa komunikasyon, wikang Filipino’y gamitin
Saan mang lugar iyong pinanggalingan
Magkaiba man ang tinubuang angkan
Upang tayo ay magkaintindihan
Wikang Filipino ating gamiting daan
Pero ang Kabataan sa bagong henerasyon
Sa mga wikang balbal at dayuhan nalason
May “Hey! Ermat at Erpat” na ngayon
Sa halip na magmano’t humalik kung gayon
Kaya Kabataan sa makabagong panahon
Sana’y tunay na Pagbabago ang maging layon
Kaya wikang Filipino sana’y ating paghusayin
Kahit ang wikang ingles ay inaasam rin
Magkaisa tayo para sa ating hinaharap
mabuting pagbabago’y ating ipangarap
Upang ipamana sa ating salinlahi
Ang kaunlaran ang ating minimithi
Magkakaiba man ang ating mga estado
Magkaisang tumayo at itaas ang noo
Ipagmalaki natin ang galing ng Pilipino
Gamitin ang Wika’t ipaalam sa mundo
Tuklasin man natin mga wikang banyaga
Ngunit sana’y pagbutihin rin ang sariling kataga
Dahil ito’y salamin ng ating pagkakakilanlan
Kaya Wikang Filipino isapuso kailanman