A-e-i-o-u ang wika ng isang bata
Hawak at binubuklat ang bawat pahina
Isang manipis at kulay dilaw
Halos lahat sa atin ay nakagamit daw
Sa di naman kalayuan ay may nakamasid
Isang gurong nakatayo mula sa silid
Nababalot ng ngiti ang kanyang mga labi
At may paghangang masasabi
Muli ay nagbalik ang ala ala
Tulad ng bata, minsan ay humawak din
Ng nasabing aklat na kulay dilaw
Na ang dulot ay talas ng kaisipan
Isa sa kultura ng mga Filipino
Bibili si nanay ng aklat na ito
Gabi gabi ay isa isang pahina
Aaralin muna bago magpahinga
Dito nagsimula tayong bumasa
Kikilalanin ay titik muna
Susundan naman ng pagpantig ng salita
At sa huli ay bubuo ng pangungusap
Anu nga bang hiwaga ang hatid mo
At tunay na ikaw’y kamangha mangha
Maaaring sa iba ikaw’y ordinaryo
Ngunit sa amin ay natatangi ka, AbaKaDa